ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗ ପକ୍ଷରୁ ବିପୁଳ ପରିମାଣର ନକଲି ମଦ ଜବତ କରିବା ସହିତ ଜଣଙ୍କୁ ଗିରଫ କରାଯାଇଛି । ସୂଚନା ମୁତାବକ ବ୍ରହ୍ମପୁର ଅବକାରୀ ଗୁଇନ୍ଦା ବିଭାଗର ଅଧିକାରିଣୀ ଗିତାଞ୍ଜଳି ସାହୁଙ୍କ ନେତୃତ୍ୱରେ ଏକ ଟିମ କେ ନୁଆଗାଁ ଥାନା ଅନ୍ତର୍ଗତ ଖମ୍ବାରିଗାଁ ଅଞ୍ଚଳରେ ପେଟ୍ରୋଲିଂ ଜାରି ରଖିଥିଲେ । ଉକ୍ତ ରାସ୍ତା ଦେଇ ଜଣେ ବ୍ୟକ୍ତି ନକଲି ମଦ ଚାଲାଣ କରୁଥିବା ପୂର୍ବରୁ ଅବକାରୀ ଗୁଇନ୍ଦା ବିାଭାଗ ପାଖରେ ସୂଚନା ରହିଥିଲା । ଉକ୍ତ ସୂଚନାକୁ ଆଧାର କରି ଛଦ୍ମ ଭେଷରେ ଜଗି ରହିଥିଲେ କର୍ମଚାରୀ ମାନେ । ଏହି ସମୟରେ ବ୍ୟକ୍ତି ଜଣଙ୍କ ଏକ ଅଟୋ (ଓଆର ୦୭ ଭି ୨୮୬୧) ରେ ନକଲି ମଦ ଧରି ଯାଉଥିଲେ । ଏହି ସମୟରେ କର୍ମଚାରୀମାନେ ତାଙ୍କୁ ଧରିବା ସହ ସେ କେଉଁ ଠାରୁ ଉକ୍ତ ମଦ ଆଣିଥିଲେ ଖବର ନେଇଥିଲେ । ଏହାପରେ ଖମ୍ବାରି ଗାଁର ଏକ ଘରେ ଚଢାଉ କରି ବିପୁଳ ପରିମାଣର ସ୍ପିରିଟ, ମଦ ବୋତଲ, କେପ, ଷ୍ଟିକର, ନକଲି ସରକାରୀ ଲେବଲ ଜବତ କରିଥିଲେ । ଏ ନେଇ ଅବକାରୀ ଗୁଇନ୍ଦା ବିଭାଗ ପକ୍ଷରୁ ଏକ ମାମଲା ରୁଜୁ କରିବା ସହ ଜଣଙ୍କୁ ଗିରଫ କରିଥିବା ସୂଚନା ଦେଇଛନ୍ତି ଅବକାରୀ ଡିଏସପି କୁବେର ସେଠୀ ।