Rasmi Ranjan Sahu
ପାରଳାଖେମୁଣ୍ଡି - ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ପୌରପରିଷଦ ପକ୍ଷରୁ ରାଜଦାଣ୍ଡ ଠାରେ ଜବରଦଖଲ ଉଚ୍ଛେଦ କରାଯାଇଥିବାର ଦେଖିବାକୁ ମିଳିଥିଲା । ଏହି ଜବରଦଖଲ ଉଚ୍ଛେଦ କେବଳ ଆଗାମୀ ରଥଯାତ୍ରା ପାଇଁ ହୋଇଥିବାର ଜଣାପଡିଛି । ଆଜି ପୌରପରିଷଦ ନିର୍ବାହୀ ଅଧିକାରୀ ବନମାଳୀ ଶତପଥିଙ୍କ ପ୍ରତ୍ୟେକ୍ଷ ତତ୍ୱାବଧାନରେ ପୌରକର୍ମଚାରୀମାନେ ରାଜଦାଣ୍ଡର ଉଭୟ ପାଶ୍ୱର୍ରେ ଥିବା ଜବରଦଖଲ ଉଚ୍ଛେଦ କରିଥିଲେ । ବିଶେଷ କରି ହୋଡିଂ ବୋର୍ଡ, ରାସ୍ତା ଉପରକୁ ମାଡି ଆସିଥିବା ଅସ୍ଥାୟୀ ଦୋକାନ ଆଦିକୁ ଉଠାଇଥିଲେ । ଏଥି ସହ ଜବରଦଖଲକାରୀଙ୍କୁ ଏପରି ପୁନରାବୃତ୍ତି ନ କରିବାକୁ ତାଗିଦ କରିଥିଲେ । ସେହିପରି ରାସ୍ତା ଉପରେ ଗାଡି ପାର୍କିଂ କରୁଥିବା ବ୍ୟକ୍ତିବିଶେଷଙ୍କୁ ସେମାନେ ନିଜେ ନିଜେ ପାର୍କିଂ ବ୍ୟବସ୍ଥା କରିବାପାଇଁ କୁହାଯାଇଛି । ଏଥି ଲାଗି ସେମାନଙ୍କୁ ସମୟ ଦିଆଯାଇଛି । ଯଦି ଆଗାମୀ ଦିନରେ ଜବରଦଖଲ କିମ୍ବା ପାର୍କିଂ ପୁନରାବୃତ୍ତି ହୁଏ ତେବେ କାର୍ଯ୍ୟାନୁଷ୍ଠାନ ସହ ଜରିମାନା ଭରିବେ ବୋଲି ଚେତାବନୀ ଦିଆଯାଇଛି । । ଅନ୍ୟପକ୍ଷରେ ପାରଳା ସହରର ରାଜଦାଣ୍ଡ ଏକ ପ୍ରମୁଖ ସ୍ଥଳ ହୋଇଥିବାରୁ ପ୍ରବଳ ଭିଡ ପରିଲିକ୍ଷିତ ହୋଇଥାଏ । ବିଶେଷ କରି ସନ୍ଧ୍ୟା ସମୟରେ ଅସ୍ଥାୟୀ ଦୋକାନୀ ମାନେ ଠେଲାଗାଡି ମାଧ୍ୟମରେ ଚାର୍ଟ, ଫାଷ୍ଟଫୁଡ, ଗୁପଚୁପ, ଜଳଖିଆ ଦୋକାନ ଆଦି କରୁଥିବାରୁ ପ୍ରବଳ ଗହଳି ହେଉଛି । ଏଥି ଯୋଗୁଁ ରାଜଦାଣ୍ଡ ରାସ୍ତା ସଂକୀର୍ଣ୍ଣ ହେବା ସହ ଟ୍ରାଫିକ ସମସ୍ୟା ସୃଷ୍ଟି କରୁଛି । ଏଥି ପ୍ରତି ପୌରପ୍ରଶାସନ ଦୃଷ୍ଟି ନିକ୍ଷେପ କରିଥିଲେ ସହରବାସୀ ଉପକୃତ ହୋଇପାରିଥାନ୍ତେ ବୋଲି ସାଧାରଣରେ ଆଲୋଚନା ହେଉଛି । ଆଜିର ଜବର ଦଖଲ ଉେଚ୍ଛେଦ ବେଳେ ବହୁ ପୌର କର୍ମଚାରୀଙ୍କ ସମେତ ଶାନ୍ତିଶୃଙ୍ଖଳା ରକ୍ଷା କରିବାପାଇଁ ପାରଳାଖେମୁଣ୍ଡି ଆଦର୍ଶ ଥାନା ଅଧିକାରୀ ବାବୁଲୀ ନାୟକଙ୍କ ତତ୍ୱାବଧାନରେ ବହୁ ପୋଲିସ କର୍ମଚାରୀ ମୁତୟନ ହୋଇଥିବାର ଦେଖିବାକୁ ମିଳିଥିଲା ।
