BHAGYAPRABHA NEWS
ବଢ଼ିଲା ନନ୍ଦନକାନନ ସଫାରୀ ଟିକେଟ ମୂଲ୍ୟ, ଏବେ ୪ଟି ସଫାରୀ ବୁଲିବା ପାଇଁ ପର୍ଯ୍ୟଟକ ଗଣିବେ ଅଧିକ ଟଙ୍କା ।ନନ୍ଦନକାନନ ପ୍ରାଣୀ ଉଦ୍ୟାନର ୪ଟି (ବାଘ, ସିଂହ, ଭାଲୁ, ତୃଣଭୋଜି) ସଫାରୀ ଟିକେଟ ଦର ବଢ଼ିଛି । ପୂର୍ବରୁ କିଛି ଘୋଷଣା ନକରି କର୍ତ୍ତୃପକ୍ଷ ଟିକେଟ ଦର ୫ଟଙ୍କା ଓ ୧୦ଟଙ୍କା ବୃଦ୍ଧି କରିଛନ୍ତି । ଏହାକୁ ନେଇ କିଛି ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ନନ୍ଦନକାନନ ପ୍ରାଣୀ ଉଦ୍ୟାନରେ ରହିଛି ସଫାରୀ ବ୍ୟବସ୍ଥା । ପର୍ଯ୍ୟଟକମାନେ ୪ଟି ସଫାରୀରେ ଖୋଲାରେ ବିଚରଣ କରୁଥିବା ବାଘ, ଭାଲୁ, ସିଂହ, ହରିଣ, ସମ୍ବର, ନୀଳଗାଈ ଆଦିଙ୍କୁ ଦେଖିପାରିବେ । ପର୍ଯ୍ୟଟକଙ୍କ ପାଇଁ ନନ୍ଦନକାନନ ପକ୍ଷରୁ ସ୍ୱତନ୍ତ୍ର ବସ୍ ବ୍ୟବସ୍ଥା ରହିଛି ।ପୂର୍ବରୁ ଏହି ସଫାରୀ ବସ୍ରେ ବୁଲିବା ପାଇଁ ସାଧାରଣ ବସ୍ ଟିକେଟ ପିଛା ୬୦ ଟଙ୍କା ଓ ଶୀତତାପ ନିୟନ୍ତ୍ରିତ ବସ୍ ପିଛା ୯୦ ଟଙ୍କା ମୂଲ୍ୟ ଥିଲା । ସେପ୍ଟେମ୍ବର ୧ରେ ହଠାତ୍ ପର୍ଯ୍ୟଟକ ଟିକେଟ କାଟିବାବେଳେ ମୂଲ୍ୟ ବଢ଼ିଯାଇଥିବା ଜାଣିବାକୁ ପାଇଥିଲେ । ଏହାକୁ ନେଇ ଅସନ୍ତୋଷ ପ୍ରକାଶ କରିଥିଲେ । ଅନ୍ୟପକ୍ଷରେ ନିୟମାନୁଯାୟୀ ଟିକେଟ୍ ମୂଲ୍ୟ ବୃଦ୍ଧି କରାଯାଇଥିବା କର୍ତ୍ତୃପକ୍ଷ କହିଛନ୍ତି । ନୂତନ ଦର ଅନୁଯାୟୀ, ପର୍ଯ୍ୟଟକ ଏବେ ୪ଟି ସଫାରୀ ବୁଲିବା ପାଇଁ ସାଧାରଣ ବସ୍ରେ ୬୫ଟଙ୍କା ଓ ଶୀତତାପ ନିୟନ୍ତ୍ରିତ ବସ୍ରେ ୧୦୦ ଟଙ୍କା ଦେବାକୁ ପଡ଼ିବ ।
