Bhagyaprabha News Bureau
ଆଜି ସକାଳ ୭ଟାରୁ ପାଟକୁରା ଭୋଟଗ୍ରହଣ କେନ୍ଦ୍ରରେ ଆରମ୍ଭ ହୋଇଯାଇଛି ମତଦାନ । ଭୋଟ୍ ଦେବା ପାଇଁ ମତଦାନ କେନ୍ଦ୍ର ସମ୍ନାରେ ଲମ୍ବା ଲାଇନ୍ରେ ଠିଆ ହୋଇ ଅତି ଶୃଂଖଳତାର ସହିତ ଭୋଟ ଦେଉଛନ୍ତି ଉଭୟ ସାଧାରଣ ଭୋଟର ଏବଂ ବଡ ବଡ ନେତା । ସେହିକ୍ରମରେ ଗରଦପୁର ବ୍ଲକ ତାଳକୁସୁମାର ୨୬୪ ନମ୍ବର ବୁଥରେ ନିଜ ମତ ସାବ୍ୟସ୍ତ କରିଛନ୍ତି ପାଟକୁରା ବିଧାନସଭା ଆସନର ବିଜେପି ପ୍ରାର୍ଥୀ ବିଜୟ ମହାପାତ୍ର। ଭୋଟ୍ ଦେବା ପରେ ବିଜୟ ମହାପାତ୍ର ନିଜର ପ୍ରତିକ୍ରିୟା ରଖି କହିଛନ୍ତି, ''ସତ୍ୟ ଓ ନ୍ୟାୟର ଜୟ ହେବ। ୧୯ ବର୍ଷ ହେଲାଣି ବିଜେଡି ଯେଉଁ ଅରାଜକତା କରି ଆସୁଛି, ତା'ର ଧ୍ୱଂସ ହେବ। ଏହା ମୋର ଲଢ଼େଇ ନୁହଁ, ଲୋକମାନଙ୍କ ଲଢ଼େଇ। ଲୋକମାନେ ଯେଉଁ ପରିବର୍ତ୍ତନ ଚାହୁଁଛନ୍ତି, ତାହା ନିଶ୍ଚିତ ହେବ।'' ସୁଚନାଯୋଗ୍ୟ, ୨୦୦୯ରେ ପାଟକୁରାରେ ବିଜେପି ପ୍ରାର୍ଥୀ ହୋଇଥିଲେ ବିଜୟ ମହାପାତ୍ର। ହେଲେ ତାଙ୍କ ଭାଗ୍ୟ ସାଥ୍ ଦେଲାନି। ସେ ପୁଣି ନିର୍ବାଚନ ହାରିଥିଲେ। ୨୦୧୪ରେ ବିଜୟ ମହାକାଳପଡ଼ାରୁ ପ୍ରାର୍ଥୀ ହୋଇଥିଲେ। ସେଠି ବି ତାଙ୍କୁ ପରାଜିତ ହେବାକୁ ପଡ଼ିଥିଲା। ଏଥର ବିଜୟ ତାଙ୍କ ପୁରୁଣା ଆସନ ପାଟକୁରାରୁ ପ୍ରାର୍ଥୀ ହୋଇଛନ୍ତି। ଏଥର ତାଙ୍କ ପାଇଁ ଶେଷ ସୁଯୋଗ। ଏହି ଶେଷ ଲଢ଼େଇରେ ବିଜୟଙ୍କ ସାଥିରେ ପାଟକୁରାବାସୀ ରହୁଛନ୍ତି ନା ନାହିଁ ଦେଖିବାକୁ ବାକି ରହିଲା। ତେବେ ବିଜେଡି ପ୍ରାର୍ଥୀ ସାବିତ୍ରୀ ଦେବୀ ଓ ବିଜେପିର ବିଜୟ ମହାପାତ୍ରଙ୍କ ମଧ୍ୟରେ କଡା ଟକ୍କର ଦେଖିବାକୁ ମିଳିଛି ।
