Bhagyaprabha News Bureau
ସାରା ଦେଶରେ ଟ୍ରାଫିକ ନିୟମ ଉଲଙ୍ଘନ କଲେ ମୋଟା ଅଙ୍କର ଜୋରିମାନା ଆଦାୟ ଚାଲିଛି । ହେଲେ ଠିକ ଏତିକି ବେଳେ ଗଞ୍ଜାମରେ ହଟ୍ଟହଟା ହୋଇଛନ୍ତି ଅତିରିକ୍ତ ଆରଟିଓ । ଛତ୍ରପୁର ଆଞ୍ଚଳିକ ପରିବହନ କାର୍ଯ୍ୟାଳୟର ଅତିରିକ୍ତ ଆରଟିଓ ବିନା ସିଟ ବେଲ୍ଟରେ ଗାଡିରେ ବସିଥିିବା ଯୋଗୁଁ ହଟହଟା ହୋଇଛନ୍ତି । ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ଜାତୀୟ ରାଜପଥରେ ଚେକିଂ ସାରି ଫେରୁଥିବା ବେଳେ ଗାଡିରେ ସିଟବେଲ୍ଟ ବାନ୍ଧି ନଥିଲେ । ଯାହାକୁ ଦେଖି ସ୍ଥାନୀୟ ଲୋକ ତାଙ୍କ ଗାଡି କୁ ଅଟକାଇ ପ୍ରଶ୍ନ କରିଥିଲେ । ଏମିତିକି ଅତିରିକ୍ତ ଆରଟିଓଙ୍କୁ କାହିଁକି ସିଟ୍ ବେଲଟ ବ୍ୟବହାର କରୁନାହାଁନ୍ତି ବୋଲି ପ୍ରଶ୍ନ କରିଥିଲେ । ହେଲେ ଭୁଲକୁ ମାନି ସତକୁ ସ୍ୱୀକାର କରିବା ବଦଳରେ ଅତିରିକ୍ତ ଆରଟିଓ ଅବାନ୍ତର ଯୁକ୍ତି କରୁଥିବା ଦେଖିବାକୁ ମିଳିଛି । ଏମିତିକି ଗାଡି ଗଡି ନଥିଲା ଓ ଗାଡି ଚାଲିଲେ ସେ ବେଲଟ ବାନ୍ଧିବେ ବୋଲି କହିଥିଲେ । ଭିଡିଓରୁ ସ୍ପଷ୍ଟ ହେଉଛି ଯେ ଛତ୍ରପୁରର ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା କଥାକୁ ଫାଙ୍କିବାକୁ ଉଦ୍ୟମ କରୁଛନ୍ତି । କାହିଁକି ନାଁ ଗାଡି ଗଡି ସାରିଥିଲା, ହେଲେ ଲୋକଙ୍କୁ ହସ୍ତକ୍ଷେପ ଓ ଭିଡିଓ ରେକର୍ଡିଂ ଯୋଗୁଁ ଗାଡି ଅଟକିଗଲା । ଆହୁରି ତାଜୁବର ବିଷୟ ହେଉଛି ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ବସିଥିବା ଗାଡିର ଡ୍ରାଇଭର ବି ସିଟ ବେଲଟ ବାନ୍ଧି ନଥିଲେ । ହେଲେ ଲୋକଙ୍କ ଭିଡିଓ ରେକର୍ଡିଂ ଦେଖି ଡ୍ରାଇଭର ଜଣକ ତରବରିଆ ଭାବେ ସିଟ ବେଲଟ ପିନ୍ଧି ପକାଇଥିଲେ । ଗତ କିଛି ଦିନ ଭିତରେ ପରିବହନ ବିଭାଗ ଟ୍ରାଫିକ ନିୟମ ଉଲଙ୍ଘନକାରୀଙ୍କ ଠାରୁ ମୋଟା ଅଙ୍କର ଜୋରିମାନା ଆଦାୟ କରୁଛି । ହେଲେ ଯେତେବେଳେ କଥା ନିଜ ଉପରକୁ ଆସୁଛି ଭୁଲ ମାନିବାପରିବର୍ତ୍ତେଚେଷ୍ଟା କରୁଥିବା ଛତ୍ରପୁରର ଏହି ଅତିରିକ୍ତ ଆରଟିଓଙ୍କର ଆଭିମୁଖ୍ୟଙ୍କ ଉପରେ ପ୍ରଶ୍ନ ଛିଡା କରୁଛି । ଲୋକସେବା ଭବନରେ ଉଚ୍ଚସ୍ତରୀୟ ବୈଠକ କରି ଜରିମାନା ଆଦାୟ ବେଳେ ନିୟମକୁ ଠିକ ଭାବେ କାର୍ଯ୍ୟକାରୀ କରିବା ଓ ବିଭାଗୀୟ ଅଧିକାରୀ କେମିତି ଟ୍ରାଫିକ ନିୟମକୁ ମାନିବେ ସେନେଇ ତାଗିତ କରାଯାଉଛି । ହେଲେ ଛତ୍ରପୁର ପରିବହନ କାର୍ଯ୍ୟାଳୟର ଅତିରିକ୍ତ ଆରଟିଓ ଶାନ୍ତନୁ କୁମାର ପରିଡା ସବୁ ନିୟମ କାନୁୁନକୁ ଯେମିତି ଫୁ କରୁଛନ୍ତି । ଏଠି ପ୍ରଶ୍ନ ଉଠିବା ସ୍ୱାଭାବିକ ଆରଟିଓ କର୍ମଚାରୀଙ୍କ ଏ ଆଚରଣ କି ପ୍ରକାରର ବାର୍ତା ଦେଉଛି । ଏହା ଉପରେ କଣ କାର୍ଯ୍ୟାନୁଷ୍ଠାନ ନେବ ପରିବହନ ବିଭାଗ ।
