ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ବଡ଼ଡୁମ୍ବୁଳା ଗ୍ରାମରେ ବ୍ୟବସାୟୀକ ଶତ୍ରୁତାକୁ କେନ୍ଦ୍ରକରି ଗତ ମଙ୍ଗଳବାର ବିଳମ୍ବିତ ରାତିରେ ଗ୍ରାମର ଶିବଶଙ୍କର ସେଠୀ ନାମକ ଜଣେ ଯୁବକଙ୍କ ଅଟୋକୁ ଉକ୍ତ ଗ୍ରାମର ପିଙ୍କୁ ସେଠୀ ଭଙ୍ଗାରୁଜା କରିଥିବା ଅଭିଯୋଗ ହୋଇଛି । ପରଦିନ ଅଟୋମାଲିକ ଶିବ ଏହି ବିଷୟରେ ପୀଙ୍କୁକୁ ପଚାରିବାରୁ ଉତ୍ତେଜିତ ହୋଇ ଗାଳିଗୁଲଜ କରିବା ସହ ଆକ୍ରମଣ କରିଥିଲେ। ପରେ ମାମଲାର ନ୍ୟାୟ ନିଶାପ ପାଇଁ କେତେକ ଗ୍ରାମବାସୀ ଚେଷ୍ଟା କରିଥିଲେ ମଧ୍ୟ ଉଭୟେ ନିଜ ନିଜ ଜିଦରୁ ଓହରି ନଥିବା ଫଳରେ ସମାଧାନ ହୋଇପାରିନଥିଲା । ଘଟଣାର ୫ ଦିନ ପରେ ଶନିବାର ସନ୍ଧ୍ୟାରେ ଅଟୋ ମାଲିକ ଶିବଙ୍କ ଏତଲା କ୍ରମେ ଥାନା ମାମଲା ନଂ ୨୫୩/୧୯ ଦଫା ୨୯୪/୩୨୩/୪୨୭/୫୦୬ ଅନୁଯାୟୀ ଅଭିଯୁକ୍ତଙ୍କ ନାମରେ ମକଦ୍ଦମା ରୁଜୁ କରାଯାଇଥିବା ଜଣାପଡ଼ିଛି।