ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ଅନ୍ତର୍ଗତ ସିଦ୍ଧେଶ୍ବର ଓ ବାସୁଦେବପୁର ରାଜସ୍ବ ନିରୀକ୍ଷକ ସର୍କଲରେ ସରକାରୀ ଜାଗାକୁ ନିଜ ଅକ୍ତିଆରରେ ରଖିଥିବାବେଳେ ସୋମବାର ସ୍ଥାନୀୟ ତହସିଲଦାର ଅଦୈତ୍ୟ କୁମାର ସ୍ବାଇଁ ଦ୍ବାରା ଜବରଦଖଲ ଉଚ୍ଛେଦ କରାଯାଇଥିବା ଜଣାପଡିଛି । ସୁଚନାନୁସାରେ , ସିଦ୍ଧେଶ୍ବର ରାଜସ୍ବ ନିରୀକ୍ଷକ ସର୍କଲରେ ରହିଥିବା ଗୋପାଳପୁର ଗ୍ରାମର କିଛି ଲୋକ ଦୀର୍ଘ ଦିନ ଧରି ସରକାରୀ ଜାଗାକୁ ନିଜର କରି ସେଠାରେ ୪ଟି ଗାଇ ଗୁହାଳ ମାନ ବସାଇଥିଲେ । ଏହାକୁ ନେଇ ସ୍ଥାନୀୟ ତହସିଲଦାର ଅଦୈତ୍ୟ କୁମାର ସ୍ବାଇଁ ଦିଗପହଣ୍ଡି ପୋଲିସଙ୍କ ଉପସ୍ଥିତରେ ସୋମବାର ପୁର୍ବାହ୍ନରେ ଜେସିବି ସାହାର୍ଯ୍ୟରେ ଉକ୍ତ ଗୁହାଳମାନଙ୍କୁ ଜବର ଦଖଲ ଉଠାଇଥିଲେ । ତେବେ ଉକ୍ତ ସ୍ଥାନରୁ ଗୁହାଳ ମାଲିକ ମାନଙ୍କୁ ଉଠାଯାଇ ସେଠାରେ ଅଙ୍ଗନୱାଡି , କୋଠାଘର ଓ କଲ୍ୟାଣ ମଣ୍ଡପ କରାଯିବ ବୋଲି ତହସିଲଦାର ସୁଚନା ଦେଇଛନ୍ତି । ଏହାପରେ ୨୦୦୯ ମସିହାରେ ବାସୁଦେବପୁର ମୌଜାରେ ବସୁନ୍ଧରାରେ ବାସଗୃହହୀନ ଲୋକଙ୍କୁ ପଟ୍ଟା ବଣ୍ଟନ କରାଯାଇଥିଲେ ମଧ୍ୟ ସେମାନଙ୍କ ଜାଗା ଚିହ୍ନଟ କରାଯାଇନଥିଲା । ପରେ ସେହି ଜାଗାରେ ଗଛ ଗୁଡିକ ବଢି ଜଙ୍ଗଲ ସଦୃଶ ହୋଇଯାଇଥିଲା । ବର୍ତ୍ତମାନ ତହସିଲଦାର ଶ୍ରୀ ସ୍ବାଇଁ ଉକ୍ତ ସ୍ଥାନକୁ ଜେସିବି ଦ୍ବାରା ସଫା କରି ଉପରୋକ୍ତ ୧୧୫ ଜଣ ହିତାଧିକାରୀଙ୍କୁ ଜାଗା ଚିହ୍ନଟ କରିବାକୁ ପଦକ୍ଷେପ ନେଇଛନ୍ତି । ଉକ୍ତ ଜବରଦଖଲ ଉଚ୍ଛେଦ ସମୟରେ ସ୍ଥାନୀୟ ଏସଆଇ ବଳଭଦ୍ର ଗଣ୍ଡ , ପୋଲିସ କର୍ମଚାରୀ ଓ ବାସୁଦେବପୁର ରାଜସ୍ୱ ନିରୀକ୍ଷକ ମିକିରାଣୀ ସାହୁ , ସିଦ୍ଧେଶ୍ବର ରାଜସ୍ୱ ନିରୀକ୍ଷକ ତିଳୋତ୍ତମା ଦୋରା ଉପସ୍ଥିତ ଥିଲେ ।