ରାଜ୍ୟରେ କରୋନା ମୁକାବିଲା ପାଇଁ ପ୍ରଶାସନିକ ସ୍ତରରେ ଜନସାଧାରଣଙ୍କ ହିତ ନିମନ୍ତେ ବହୁ ଉଚ୍ଚ ପଦକ୍ଷେପ ନିଆଯାଉଥିବା ଜଣାପଡିଛି । କିନ୍ତୁ ଲକଡାଉନ ପ୍ରଭାବରେ ସମସ୍ତ ଲୋକମାନେ ପ୍ରଭାବିତ ହୋଇଛନ୍ତି । ଏହି ଅବସରରେ ଦିଗପହଣ୍ଡି ଅଞ୍ଚଳରେ ରହୁଥିବା ଗାଡି ଚାଳକ ଓ ହେଲ୍ପର ମାନେ ବର୍ତ୍ତମାନ ଦୁର୍ଦ୍ଦଶା ମଧ୍ୟରେ ଗତି କରୁଛନ୍ତି । ତେଣୁ ସେମାନଙ୍କୁ ସରକାରୀ ସହାୟତା ନିମନ୍ତେ ଶ୍ରମିକ ସଙ୍ଗଠନ ଅଖିଳ ଭାରତ ଟ୍ରେଡ୍ ୟୁନିୟନ କଂଗ୍ରେସ ( ଏ ଆଇ ଟି ୟୁ ସି) ଗଞ୍ଜାମ ଜିଲା ସମ୍ପାଦକ ଅଳକ ନାଥ ମିଶ୍ର ଦାବୀ କରିଛନ୍ତି । ଦିଗପହଣ୍ଡି ବସଷ୍ଟାଣ୍ଡ ନିକଟ ଶ୍ରମିକ ସଙ୍ଗଠନ ଏ ଆଇ ଟି ୟୁ ସି କାର୍ଯ୍ୟାଳୟରୁ ସ୍ଥାନୀୟ ଖେମୁଣ୍ଡି ମିନିବସ୍ ଗାଡି ଚାଳକ ଓ ହେଲ୍ପର ସଙ୍ଘର ସମସ୍ତ କର୍ମକର୍ତ୍ତା , ସଦସ୍ୟ ବୃନ୍ଦ ନୀରବ ଶୋଭାଯାତ୍ରାରେ ବାହାରି ସ୍ଥାନୀୟ ତହସିଲ କାର୍ଯ୍ୟାଳୟ ଠାରେ ପହଞ୍ଚିଥିଲେ ।ସାମାଜିକ ଦୂରତ୍ବ ଅବଲମ୍ବନ ପୂର୍ବକ ସେମାନେ ତହସିଲଦାର ଅଦ୍ଵୈତ କୁମାର ସ୍ବାଇଁଙ୍କୁ ସାକ୍ଷାତ କରି ସରକାରୀ ସହାୟତା ନିମନ୍ତେ ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦସ୍ତଖତ ସମ୍ବଳିତ ସ୍ମାରକପତ୍ର ପ୍ରଦାନ କରିଥିଲେ । ପରେ ରାଜ୍ୟ ବିଧାନସଭା ବାଚସ୍ପତି ସୂର୍ଯ୍ୟନାରାୟଣ ପାତ୍ର ,କେନ୍ଦ୍ର ସଡ଼କ ପରିବହନ ମନ୍ତ୍ରୀ , ଦକ୍ଷିଣାଞ୍ଚଳ ରାଜସ୍ବ କମିଶନର , ଗଞ୍ଜାମ ଜିଲ୍ଲାପାଳ, ବ୍ରହ୍ମପୁର ଉପଜିଲ୍ଲାପାଳ , ଦିଗପହଣ୍ଡି ବିଡ଼ିଓ ହଳଧର ଶବର ,ଏନ୍ ଏ ସି କାର୍ଯ୍ୟନିର୍ବାହୀ ଅଧିକାରୀ ପ୍ରଫୁଲ୍ଲ ଚନ୍ଦ୍ର ଡାକୁଆଙ୍କୁ ସ୍ମାରକପତ୍ରର ଅବିକଳ ନକଲ ଡାକ ଯୋଗେ ପ୍ରେରଣ କରାଯାଇଥିବା ନେଇ ଗାଡି ଚାଳକ ଓ ହେଲ୍ପର ସଙ୍ଘ ସମ୍ପାଦକ ହରିକୃଷ୍ଣ ଗୌଡ , କର୍ମକର୍ତ୍ତା ଗୋବିନ୍ଦ ନନ୍ଦ, ସନ୍ତୋଷ ବେହେରା , ସୁରେନ୍ଦ୍ର ସାହୁ , ମନୋଜ ଗୌଡ ପ୍ରମୁଖ ଜଣାଇଛନ୍ତି।