ଗଞ୍ଜାମ ଜିଲ୍ଲାର ସାନଖେମୁଣ୍ଡି ବ୍ଳକର ଖଲିଙ୍ଗି ପଞ୍ଚାୟତକୁ କରୋନା ସଂକ୍ରମଣ ଭୟରେ ବୁଧବାର ଦିନ ସ୍ଥାନୀୟ ମହିଳା ସରପଞ୍ଚ ମଧୁସ୍ମିତା ବିଷୋୟୀ ଜିଲ୍ଲାପାଳ କ୍ଷମତା ପ୍ରୟୋଗ କରି ୭ ଦିନ ପର୍ଯ୍ୟନ୍ତ ସଟଡାଉନ ଘୋଷଣା କରିଥିବା ଜଣାପଡିଛି । ଖବରନୁଯାୟୀ , ସାନଖେମୁଣ୍ଡି ବ୍ଲକରେ ଦିନକୁ ଦିନ କରୋନା ପଜିଟିଭଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଆକ୍ରାନ୍ତଙ୍କ ସଂଖ୍ୟା ଶହେ ଛୁଇଁଥିବା ଜଣାପଡିଛି । ଆଜି ପୁଣିଥରେ ଖଲିଙ୍ଗି ପଞ୍ଚାୟତରେ କିଛି ଲୋକ କରୋନାରେ ଆକ୍ରାନ୍ତ ହୋଇଥିବା ବେଳେ ସଂକ୍ରମଣ ଭୟରେ ତଥା ପଞ୍ଚାୟତବାସୀଙ୍କ ସୁରକ୍ଷା ଦୃଷ୍ଟିରୁ ପ୍ରଥମେ ସରପଞ୍ଚ ପ୍ରଶାସନ ନିକଟରେ ଘଟଣା ସମ୍ପର୍କରେ ଅବଗତ କରାଇଥିଲେ । ଏହାପରେ ପ୍ରଶାସନର ନିର୍ଦ୍ଦେଶ କ୍ରମେ ଉକ୍ତ ଗ୍ରାମରେ ଧେଣ୍ଡୁରା ମାରି ପଞ୍ଚାୟତକୁ ସଟଡାଉନ ଘୋଷଣା କରିଥିଲେ । ତେବେ ଏହି ସଟଡାଉନ ସମୟରେ ଜରୁରୀକାଳୀନ ସେବା ସହ ଚାଷୀମାନେ ଚାଷକାର୍ଯ୍ୟ କରିପାରିବେ ବୋଲି କହିଛନ୍ତି ସରପଞ୍ଚ ମଧୁସ୍ମିତା ବିଷୋୟୀ । ଏଥିସହ ସମସ୍ତ ଜନସାଧାରଣ ସରକାର ନିୟମକୁ ସହଯୋଗ କରିବା ସହ ସାମାଜିକ ଦୂରତ୍ବ ରକ୍ଷା କରି ବାହାରକୁ ବାହାରିବା ସମୟରେ ମାସ୍କ ପରିଧାନ କରିବା ତେବେ କରୋନା ଠାରୁ ମୁକ୍ତି ପାଇପାରିବା ବୋଲି ସଚେତନ କରାଇଥିଲେ । ଏହି ସମୟରେ ସ୍ଥାନୀୟ ସରପଞ୍ଚ ପ୍ରତିନିଧି ସଞ୍ଜୟ ରାଉତ ଉପସ୍ଥିତ ରହିଥିଲେ ।