Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ଅଧୀନରେ ରହିଥିବା ଏକମାତ୍ର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଯାହାକି ଦିଗପହଣ୍ଡି ସହର ସମେତ ବ୍ଳକର ବହୁ ଲୋକ ଏଠାକାର ସ୍ବାସ୍ଥ୍ୟବସ୍ଥା ଉପରେ ନିର୍ଭର କରିଥାନ୍ତି । କିନ୍ତୁ ଏଠାରେ ଦିନକୁ ଦିନ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହେବାରେ ଲାଗିପଡିଛି । ଯାହାକୁ ନେଇ ବୁଧବାର ସକାଳେ କଂଗ୍ରେସ , ସିପିଆଇ ଓ ସିପିଆଇ (ଏମ୍) ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ପ୍ରଦାନ କରାଯାଇଥିଲା । ଖବରପ୍ରକାରେ , କରୋନା ମହାମାରୀ ଯୋଗୁଁ ଗତ କିଛିଦିନ ତଳେ ସ୍ବାସ୍ଥ୍ୟକେନ୍ଦ୍ରର ଡାକ୍ତର , ଫାର୍ମାସିଷ୍ଟ ଓ କିଛି କର୍ମଚାରୀମାନେ କରୋନା ସଂକ୍ରମଣରେ ଆକ୍ରାନ୍ତ ହୋଇଥିଲେ । ଯାହାଫଳରେ ସେମାନଙ୍କୁ କୋଭିଡ ହସ୍ପିଟାଲକୁ ନିଆଯାଇଥିଲା । କିନ୍ତୁ ବର୍ତ୍ତମାନ ମେଡିକାଲକୁ ସାନିଟାଇଜର କରାଯାଇଥିବା ବେଳେ ପୂର୍ବଭଳି ରୋଗୀସେବା ବଳବର୍ତ୍ତର ରଖାଯିବା ପାଇଁ ନିର୍ଦ୍ଦେଶ ରହିଅଛି । କିନ୍ତୁ ଡାକ୍ତରମାନେ ରୋଗୀମାନଙ୍କର ଚିକିତ୍ସା କରିବା ଦୂରର କଥା ଏକ କାଗଜରେ ମେଡ଼ିସିନ ଲେଖି ରୋଗୀକୁ ଫେରାଇ ଦେଉଛନ୍ତି । ଯାହାକୁ ନେଇ ବୁଧବାର ଦିନ ସ୍ଥାନୀୟ ଅଞ୍ଚଳରେ ଅରାଜକତା ପରିସ୍ଥିତି ସୃଷ୍ଟି ହୋଇଥିବା ଜଣାପଡିଛି । ସେମାନଙ୍କ କହିବାନୁଯାୟୀ , ଗଞ୍ଜାମ ଜିଲ୍ଲାରେ ଏବେ ବହୁ ଲୋକ କରୋନାରେ ସଂକ୍ରମିତ ହେବା ସହ କିଛି ମୃତ୍ୟୁବରଣ ମଧ୍ୟ କରିଛନ୍ତି । ଏହାର ପ୍ରଭାବ ଦିଗପହଣ୍ଡି ଏନ୍ ଏସି ଓ ବ୍ଳକରେ ମଧ୍ୟ ଦେଖିବାକୁ ମିଳିଛି । ଏପରିକି ଦିଗପହଣ୍ଡିରେ ପ୍ରତ୍ୟେକ ଦିନ ଶହଶହ ଲୋକ ଜ୍ବରରେ ପୀଡିତ ରହୁଥିବା ଜଣାପଡିଛି କିନ୍ତୁ ସମସ୍ତେ କରୋନାରେ ଆକ୍ରାନ୍ତ ନ ଥିବା ବେଳେ ସଂକ୍ରମଣ ଭୟରେ ଡାକ୍ତର କିମ୍ବା କର୍ମଚାରୀ ମାନେ ଚିକିତ୍ସା କରୁନାହାନ୍ତି । ଯାହାଫଳରେ ରୋଗୀମାନେ ଉତ୍ତମ ଚିକିତ୍ସା ନ ପାଇ ମୃତ୍ୟୁବରଣ କରୁଛନ୍ତି । ରାଜ୍ୟ ସରକାର ଲକଡାଉନ ଓ ସଟଡ଼ାଉନ କଟକଣା ଜାରି କରିଥିବା ବେଳେ ମେଡିକାଲ ଷ୍ଟୋର ମାନଙ୍କରେ ଔଷଧ ମିଳୁନାହିଁ ଏବଂ ଗାଡି ଚଳାଚଳ ସମ୍ପୂର୍ଣ୍ଣ ବନ୍ଦ ରଖିଛନ୍ତି । ଯାହାଫଳରେ ରୋଗୀମାନେ ନାହିଁ ନ ଥିବା ଅସୁବିଧା ହେବାକୁ ପଡୁଥିବା ଜଣାପଡିଛି । ତେଣୁ ଆଜି ଏହି ତିନିଦଳର ନେତୃବୃନ୍ଦ ମିଳିତଭାବେ ଦିଗପହଣ୍ଡି ଏନ୍ ଏସି ଓ ବ୍ଳକ ଅଞ୍ଚଳରେ କେବଳ ଘୋଷଣାରେ ସୀମିତ ନ ରହି ନିର୍ଦ୍ଧିଷ୍ଟ କାର୍ଯ୍ୟକାରୀ ପଦକ୍ଷେପ ନେବାକୁ ସରକାରଙ୍କୁ ଆହ୍ବାନ କରିବା ସହ ଗଭୀର ଉଦବେଗ ପ୍ରକାଶ କରିଛନ୍ତି । ଏନେଇ ଉପସ୍ଥିତ ନେତୃବୃନ୍ଦ ମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ମାନ୍ୟବର ବାଚସ୍ପତି ତଥା ସ୍ଥାନୀୟ ବିଧାୟକ ଡଃ ସୂର୍ଯ୍ୟନାରାୟଣ ପାତ୍ର ଏ ଦିଗରେ ଦୃଷ୍ଟି ଦେବାକୁ ଦୃଢ଼ତାର ସହ ସାଧାରଣରେ ଦାବି କରିଥିଲେ । ଆଗାମୀ ଦିନରେ ଯଦି କୌଣସି ପନ୍ଥା ସରକାର ପକ୍ଷରୁ ଅବଲମ୍ବନ କରାନଯାଏ ତେବେ ସାଧାରଣ ଜନତା ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି । ଏହି ଦାବି ସମୟରେ ସିପିଆଇ (ଏମ୍) ନେତା କୈଳାସ ଷଡଙ୍ଗୀ , ସିପିଆଇ ନେତା ଅଳକନାଥ ମିଶ୍ର , କଂଗ୍ରେସ ନେତା ପ୍ରଫୁଲ୍ଲ ପଣ୍ଡା ଉପସ୍ଥିତ ରହିଥିଲେ ।
