Kiran Behera
ଗଞ୍ଜାମ ଜିଲ୍ଲା ଦିଗପହଣ୍ଡି ଥାନା ନରେନ୍ଦ୍ରପୁର ଗ୍ରାମ ଶ୍ମଶାନ ନିକଟରେ ମଙ୍ଗଳବାର ପୂର୍ବାହ୍ନ ୯ ଘଣ୍ଟ ସମୟରେ ଏକ ଭୟାନକ ସଡ଼କ ଦୁର୍ଘଟଣା ହୋଇଥିବା ଜଣାପଡିଛି । ନିଜ ମାମୁଁଙ୍କ ମୃତ୍ୟୁ ପରେ ଅନ୍ତିମ ଦର୍ଶନ ପାଇଁ ଭୁବନେଶ୍ବର ସହରରୁ ଆସିଥିବା ଭଣଜାର ସଡକ ଦୁର୍ଘଟଣା ଘଟି ଗୁରୁତର ହୋଇଥିବା ଜଣାପଡିଛି । ଗୁରୁତର ଯୁବକ ହେଲେ ଭୁବନେଶ୍ୱର ସାଲିଆ ସାହି ଏକାମ୍ବ୍ର ବିହାରର ଅନୀଲ ରେଡ୍ଡୀ ବୋଲି ଜଣାପଡିଛି । ଖବରନୁଯାୟୀ , ଗୁରୁତର ଅନୀଲଙ୍କ ମାମୁଁ ସୁଶାନ୍ତ ରେଡ୍ଡୀ ଦିଗପହଣ୍ଡି ଥାନା କାଣ୍ଡେଶ୍ବର ଗ୍ରାମରେ ରହୁଥିବା ବେଳେ ଗତକାଲି ରାତିରେ ଅଚାନକ ମୃତ୍ୟୁ ହୋଇଥିଲା । ମୃତ୍ୟୁ ଖବର ପାଇବା ପରେ ଅନୀଲ ନିଜ ପରିବାର ସହ ବିଳମ୍ବିତ ରାତିରେ ଗ୍ରାମରେ ପହଞ୍ଚି ଅନ୍ତିମ ଦର୍ଶନ କରିଥିଲେ । ମଙ୍ଗଳବାର ସକାଳୁ କୈାଣସି କାରଣରୁ ଅନୀଲ ଏକ ଆପାଚି ବାଇକ ( ଓଡି୦୨ ଏକ୍ଯୁ ୮୧୦୨) ଯୋଗେ ଦ୍ରୁତ ଗତିରେ ଦିଗପହଣ୍ଡି ଅଭିମୁଖେ ଯାଉଥିବା ସମୟରେ ନରେନ୍ଦ୍ରପୁର ଗ୍ରାମ ଶ୍ମଶାନ ବୁଲାଣି ରାସ୍ତାରେ ଅନୀଲ ନିୟନ୍ତ୍ରଣ ହରାଇଥିଲେ । ତେବେ ଉକ୍ତ ରାସ୍ତାଦେଇ ଯାଉଥିବା ଟ୍ରାକ୍ଟର (ଓଡି୦୭ ଟି ୧୯୧୬) ପଛପଟୁ ଧକ୍କା ଦେଇଥିଲା । ଘଟଣାସ୍ଥଳରୁ ଗ୍ରାମବାସୀଙ୍କ ସହାୟତାରେ ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ , ପରେ ବ୍ରହ୍ମପୁର ବଡ଼ମେଡ଼ିକାଲରେ ଭର୍ତ୍ତି କରାଯାଇଥିଲା । ସେଠାରେ ମଧ୍ୟ ଅନୀଲଙ୍କ ଚିକିତ୍ସାରେ ଅବନତି ଘଟିବାରୁ କଟକ ମେଡିକାଲ ନେଇଥିବା ବିଶେଷ ସୁତ୍ରରୁ ସୂଚନା ମିଳିପାରିଛି ।
