Rasmi Ranjan Sahu
ପାରଳାଖେମୁଣ୍ଡି- ଗଜପତି ଜିଲ୍ଲା ଗୋଷାଣୀ ବ୍ଲକ ଗୁରଣ୍ଡି ଥାନା ଅନ୍ତର୍ଗତ ପାଟିକୋଟା ଛକ ନିକଟରେ ଦୁଇ ଗୋଟି ଅଟୋ ମୁହାମୁହିଁ ଧକ୍କା ହେବା ଯୋଗୁଁ ଦୁଇ ଶିଶୁଙ୍କ ଜୀବନ ଯାଇଥିବା ବେଳେ ଏହି ଘଟଣାରେ ଚାରି ଜଣ ଆହତ ହୋଇଛନ୍ତି । ଏଭଳି ମର୍ମନ୍ତୁଦ ଦୁର୍ଘଟଣାରେ ନୂଆଗଡ ବ୍ଲକର ଭ୍ରମରପୁର ଅଞ୍ଚଳର ମୃତ ଶିଶୁ ହେଲେ ଉକ୍ତ ଗ୍ରାମର ମାହି ମଣ୍ଡଳ ( ୦୪ ବର୍ଷ) ଓ ଗୁଲବି ପାଳ (୦୩ ବର୍ଷ) । ଆହତଙ୍କ ମଧ୍ୟରେ ସୁନିତା ମାଳି, ବେବି ମାଳି ଏବଂ ପ୍ରୀତିଜିତା ପରିଛା ରହିଛନ୍ତି । ସକାଳ ସମୟରେ ଏପି ୩୦ ଟିଏ ୦୮୬୦ ନମ୍ୱର ଅଟୋଟି ନୂଆଗଡ଼ ବ୍ଲକ ଭ୍ରମରପୁର ଗ୍ରାମରୁ କିଛି ମହିଳାଙ୍କୁ ନେଇ ପାରଳାଖେମୁଣ୍ଡି ଆଭିମୁଖେ ଆସୁଥିବା ସମୟରେ ପାଟିକୋଟା ଛକ ନିକଟରେ ଡ୍ରାଇଭରର ଆଖି ପଡିଯିବା ଫଳରେ ସମୁଖପଟ ରୁ ଆସୁଥିବା ଅନ୍ୟ ଏକ ଅଟୋ ଏପି ୩୦ ଟିବି ୧୪୬୨ ସହ ମୁହାଁମୁହି ଧକ୍କା ହୋଇ ଦୁର୍ଘଟଣା ଘଟିଥିଲା । ତେବେ ସମସ୍ତ ଆହତ ଙ୍କୁ ପାରଳାଖେମୁଣ୍ଡି ଜିଲା ମୁଖ୍ୟ ଚିକିତ୍ସାଳୟରେ ଯୁଦ୍ଧକାଳୀନ ଭିତ୍ତିରେ ଚିକିତ୍ସା କରାଯାଇଛି । ଆବଶ୍ୟକ ସ୍ଥଳେ ଅଧିକ ଚିକିତ୍ସା ପାଇଁ ବାହାରକୁ ସ୍ଥାନାନ୍ତର କରାଯିବ ବୋଲି ଡିଏମଓ ପ୍ରମୋଦ କୁମାର ପଣ୍ଡା କହିଛନ୍ତି । ସେପଟେ ଦୁର୍ଘଟଣାସ୍ଥଳରେ ଗୁରାଣ୍ଡି ଥାନା ପୋଲିସ ପହଞ୍ଚି ଡ୍ରାଇଭର କୁ ଗିରଫ କରି ଦୁର୍ଘଟଣାର ତଦନ୍ତ ଆରମ୍ଭ କରିଥିବା ବେଳେ ୧୫/୨୪ ନଂ ରେ ମାମଲା ରୁଜୁ କରାଯାଇଥିବା କହିଛନ୍ତି ଥାନା ଅଧିକାରୀ ଆନନ୍ଦ ପାତ୍ର ।
