ଗତକାଲି ଫିଲ୍ମ ଫ୍ରାଇଡେ'ରେ ବଡ ପରଦାରେ ରିଲିଜ ହୋଇଯାଇଛି ସାହିଦ କପୁର ଓ କିଆରା ଆଡଭାନିଙ୍କ ଅଭିନିତ ବହୁ ପ୍ରତିକ୍ଷିତ ଫିଲ୍ମ କବୀର ସିଂ । ପ୍ରଥମ ଦିନରେ ବିଗ୍ ରେସପନ୍ସ ହାସଲ କରିଛି ଶାହିଦ କପୁରଙ୍କ ଅଭିନୀତ ଏହି ଚଳଚ୍ଚିତ୍ର । କିଆରା ଆଡଭାନୀ ଓ ଶାହିଦଙ୍କ ଯୋଡି ବେଶ ପସନ୍ଦ ଆସିଛି ଦର୍ଶକଙ୍କୁ । ସୁଚନାଯୋଗ୍ୟ , ଏହି ଫିଲ୍ମଟି ସାଉଥ ଫିଲ୍ମ ଅର୍ଜୁନ ରେଡ୍ଡୀ ଫିଲ୍ମର ରିମେକ । ଭାରତରେ ୩୧୨୩ ଓ ବିଦେଶରେ ୪୯୩ଟି ହଲରେ ରିଲିଜ ହୋଇଛି ସନ୍ଦିପ ରେଡ୍ଡି ଭାଙ୍ଗାଙ୍କ ନିର୍ଦ୍ଦେଶିତ ମୁଭି କବୀର ସିଂ । ରିଲିଜର ପ୍ରଥମ ଦିନରେ ହିଁ ବହୁ ଦର୍ଶକଙ୍କ ମନକୁ ଛଇଁ ପାରିଛି ଏହି ଫିଲ୍ମ ।
ଲୋକଙ୍କ ପ୍ରତିକ୍ରିୟାରୁ ଚଳଚ୍ଚିତ୍ରଟି ଭଲ ଆୟ କରିବ ବୋଲ ଆଶା କରାଯାଉଛି । ଏହି ଫିଲ୍ମରେ ସାହିଦ କପୁରଙ୍କୁ ଭିନ୍ନ ଏକ ଚରିତ୍ରରେ ଦେଖିବାକୁ ମିଳିଛି । ଫିଲ୍ମର କାହାଣୀନୁସାରେ ,ଏଆଇଏମ୍ ରେ ଡାକ୍ତର ପାଠ ପଢୁଥିବା କବୀର (ଶାହିଦ)ଙ୍କୁ ଜଣେ ମେଧାବୀ ଛାତ୍ର ଭାବେ ଦେଖିବାକୁ ମିଳିଛି । ଏଥିସହ ସେ ଖେଳ ଓ ଅନ୍ୟାନ୍ୟ କ୍ଷେତ୍ରରେ ମଧ୍ୟ ବେଶ ପାରଙ୍ଗମ ଅଛନ୍ତି । ହେଲେ ଛୋଟ ଛୋଟ କଥାରେ ସଙ୍ଗେ ସଙ୍ଗେ ରାଗିଯିବା ଗୁଣ ମଧ୍ୟ କବୀରଙ୍କ ଅଛି ।ଏହି ସମୟରେ ତାଙ୍କ ଜୀବନକୁ ଆସନ୍ତି ପ୍ରୀତି (କିଆରା) । ପ୍ରୀତିଙ୍କ ସାଦାସିଧା ଗୁଣରେ ପ୍ରଭାବିତ ହୋଇ ତାଙ୍କ ପ୍ରେମରେ ପଡିଯାଆନ୍ତି କବୀର । ହେଲେ ତାଙ୍କ ଜୀବନରୁ ପ୍ରୀତି ଦୂରେଇ ଯାଆନ୍ତି । ଏହା ପରେ କିପରି କବୀର ବରବାଦିର ରାସ୍ତାରେ ଚାଲନ୍ତି ଏବଂ ଏହା ପରେ ତାଙ୍କ ଜୀବନରେ କି ମୋଡ ଆସେ ତାହାକୁ ଚଳଚ୍ଚିତ୍ରରେ ଦେଖାଯାଇଛି ।